Ko Ngā Whetū Hauhau, Ko Ngā Whetū Tarakaka o Matariki

E whakarākei muramura ana ngā tae i ngā pikitia o te pukapuka. He tohu pai o te hauhautanga o Ururangi me te kaha o te ngao o Waipunarangi. He mea waihanga ngā whakaahua ki te peita waikano me te pene rākau, ki te Adobe Illustrator hoki me tētahi papatuhi Wacom.

Ko te pukapuka nei tētahi o te punipuni pukapuka. Kei te whakamārama te pūrakau i ngā āhuatanga o ēnei whetū o te Kāhui Matariki, Ko Ururangi rāua Ko Waipunarangi. I te wā e pānui ana ahau i rongo ahau i te āhuatanga porehu nā te timatanga o te pūrakau. Pērā i te rārangi “….ka rangona hoki ngā kōhimuhimu i ngā hau e mea ana i tētahi kura huna…”. He pūrākau Māori tēnei, te tuku, te taiao, te mahi ki roto, te whānau anō hoki, nō reira he tapiritanga pai te pukapuka nei ki te puna pukapuka Māori. Ka taea e mātou te kite i a mātou ki roto i ēnei whārangi. He āwhina nui te puna kupu i te kumu o te pukapuka. He pai ki te pānui i ngā kupu hou mō te āhuatanga ōrite. Pērā i ēnei kupu taurite: rikoriko, wheriko, kōpura me tarakaka, hauhau, hūkerikeri, pūkerikeri. He wheako pai tēnei mā ngā tamariki kia peita ai ngā kupu i te pikitia whānui o ō rātou whakamāramatanga o te pūrākau. Anei taku mihi maioha ki te kaituhi, Ko Miriama Kamo. Kāore e kore, ka rongo te marea o ngā tamariki i te pūrakau nei ia Matariki, ia Matariki.