Kupe me te Wheke Nui a Muturangi

He pai tēnei momo toi ki ahau, he tino Māori ngā pikitia, he māmā, he nui, he ātaahua anō hoki. He hakari ēnei pikitia mō ngā whatu o te tangata.

He waia ngā kupu ki roto i te pūrakau nei ki ngā tamariki Māori pērā i ngā kīanga ‘i Hawaiki nui, i Hawaiki roa, i Hawaiki pāmamao’. Ahakoa he ngāwari te pānui, kāore te kaituhi i whakapēpi i te kōrero ki roto i te pūrākau. Ki ahau, he tohu tēnei o ngā pūkenga rau o te kaituhi Māori. He pūrākau hikaka tēnei mā ngā tamariki, ki roto nei he whawhai, he haerenga nui, te mahi ngātahi a te iwi me ngā tohu o te taiao.

Mēnā kei te rapu koe i tētahi pukapuka, he ātaahua ngā pikitia, te mahi toi ki roto, he ngāwari te pānui heoi he kounga tonu te kōrero, ko tēnei te pukapuka māu. He koha tēnei pukapuka ki te ao Māori, ki te ao o ngā Tauiwi hoki. Ko tēnei te hītori, te matauranga Māori o te tapaina o Te Moana o Raukawakawa me Aotearoa. Ahakoa he pukapuka mā ngā tamariki tēnei, he mātauranga tuku iho mō te katoa. Ka taea te hoko te pukapuka nei i te reo Ingarangi hoki.

Anei taku mihi maioha ki a Mat Tait, me te kaitā o tēnei pukapuka pikitia rerehua.